الرباعيات
ليه يا حبيبتي ما بينا دايما سفر
والبعد ذنب كبير لا يُغتفر
ليه يا حبيبتي ما بينا دايما بحور
أعدي بحر الاقي غيره إتحفر
عجبي!!
ورا كل شباك الف عين مفتوحين
وانا وانتي ماشيين يا غرامي الحزين
لو التصقنا نموت بضربه حجر
ولو إفترقنا نموت متحسرين
عجبي!!
اعرف عيون هي الجمال والحسن
واعرف عيون تاخد القلوب بالحضن
وعيون مخيفه وقاسيه وعيون كتير
وباحسّ فيهم كلهم بالحزن
عجبي!!
يا طير يا عالي في السما طُظ فيك
ما تفتكرشي ربنا مٌصطَفيك
برضك بتاكل دود وللطين تعود
تمص فيه يا حلو ...ويمص فيك
عجبي!!
كيف شفت قلبي والنبي يا طبيب
هَمَد ومات والا سامع ليه دبيب
قاللي لقيته مختنق بالدموع
ومالوش دوا غير لمسه من إيد حبيب
عجبي!!
قلبي عليل يا ناس وفي الكاس دواه
مدِّيت له إيدي شربت م اللي حَواه
جنبي الشمال خف ...اليمين اتوجع
وايه يداوي الكبد م اللي كواه
عجبي!!
دخل الشتا وقَفَل البيبان ع البيوت
وجعل شعاع الشمس خيط عنكبوت
وحاجات كتير بتموت في ليل الشتا
لكن حاجات اكتر بترفض تموت
عجبي!!
يا للي بتبحث عن إله تعبده
بحث الغريق عن اي شيء ينجده
الله جميل وعليم ورحمن رحيم
إحمل صفاته ...وانت راح توجده
عجبي!!
عيني رأت عصفور ووياه ابنه
بيحدفه في الريح وياخده ف حضنه
نوبتين وتالت نوبه – عجبي عليهم –
كانوا سوا بيرفرفوا ويغنوا
عجبي!!
مانتاش بتلعب ليه يا روح بابا؟
ولا عسكري ولا لص في عصابه؟
إلعب أسد او ديب رهيب أو غزال
دي الدنيا في نهايه المطاف غابه
عجبي!!
